1 Peter

1 Peter cu Rom Pennak, Asian Minor peng ah ralzam le khual um in a ummi Khrihfa hna sinah kuat mi Peter Cakhuat Pakhatnak hrilhfiah a si. Caṭialtu nih Grik biakal ning hoih in Peter cakuat cu a leh. Grik Baibal le Lai Baibal Thiang cherhchan in ṭialmi hrilhfiah cauk a si.

“Rev. Dr. Hrang Zel a ṭialmi Peter Cakuat Pakhatnak (1 Peter) hrilhfiah hi Baibal hrilhfiah ṭialmi hna lak ah chawrawk tlaak taktak asi tiah ka ruah. Laica in chuahmi Baibal hrilhfiah cauk hna hi an tam rihlo i rel ding zongah cutlukpi cun kan hmu kho rih hna lo. Laica in chuahmi Baibal hrilhfiah cauk tete zong an umpah nain atu Dr. Hrang Zel nih a ṭial i a chuahmi Peter kuat khatnak hrilhfiah hi a ṭhabik pawl asi ko lai tiah ka ruah. Aruang cu a ṭialning ah dalkhat hnu dalkhat le caangkhat hnu caangkhat in a zonzai i Peter nih a rak hmanmi Grik biafang fianhnak tete zong a ṭhat khawh chungin a telhchih lengmang. Thiolozi zong khrihfa kan zumhning tein a kheen taktak fawn.

Rom pennak tang ah Khrihfa a si mi hna cu an zumhnak ruangah hremainak le temhinnak an tuar hna i peng kip le khuakip ah ralzaam bantuk in an vaakvai  hna. Cubantuk sining a tong mi hna cu an zumhnak a zornak hngalo an zumhmi Pathian kha fianghlang tein hmuhkhawh dingah cawnpiak thiam a hau. Rom pennak huham ṭhawnnak le pathian dangdang biaknak a larnak hmun ah khua a sami hna Khrihfa pawl kha Peter nih thazaang a pek hna tikah thumkawmh Pathian a um taktaknak le zeizong thil vialte a sertu le vel le dawtnak in a khatmi a sinak kong kha fiangte in a langhter.

Thumkawmh Pathian nih a thimmi miphun thiang kan si caah a kan kamhmi “ro” khamhnak zong a cotu kan si i khamhnak a co cangmi zumtu hna zumhphung (doctrines), zulhphung (practices) le nunzia (attitudes) hna zong fiangte in kan hmuh. Hi cauk hi Khrihfa kan caah cun nun chimtu asi. Pumpak nunnak, chungkhar nunnak, zatlaang nun,  le khrihfabu nunnak hrimhrim ah lam hmuhsaktu cauk a si.

Phungchimtu Sayate, Sayamate, le Evangelists pawl nih rel le hman ding hrimhrim asi. Thawngṭha chimnak caah le cawnpiaknak caah hman a tlaak taktakmi cauk asi caah Pastorte le Baibal sianginn ah ca a chimmi Professors vialte nih rak rel hrimhrim u tiah kaan forh hna.”

Rev. Dennis S. Maung, Ph.D., D.Min.