Pathian cu Yahweh hlan ah El tiah hngalh hmasat a rak si. Israel pupa hna sinah Pathian cu El Shaddai in a lang. Moses sinah Yahweh in a lang. Isaiah chimchung bantukin kan chan ah Immanuel in a rung lang. Cuticun, chungkhar pathian cu miphun Pathian le van le vawlei (universal) Pathian a hun si. Baibal ah universal Pathian, Yahweh Elohim cu ramkip (international) Pathian bel a si rih lo; ram nih an ram pathian an i ngeih rih. Kan chim laimi El Shaddai kong nih an buaiter lai. Buainak kan duh lo; Israel pupa nih Pathian an hngalh ning aa thawknak le a ṭhannak fianter kan duh. “El Shaddai” cuannak oi relnak, a sullam le a theology kan zoh hna lai.
“El Shaddai” Oi Relnak
Complete Jewish Bible ah “Elohim” telh loin El a telmi Pathian min panga a cuang: El Elyon (oi 7: “Cungnung Bik Pathian,” Gen 14:18-22, Slm 78:35, Dan 3:26), El Roi (oi 1; “Hmutu Pathian,” Gen 16:13), “El Shaddai” (oi 7; “Lianngan Bik Pathian”), “Pele-Yo’etz El Gibbor Avi Ad Sar-Shalom” (oi 1; Isa 9:5), le “Immanu El” (oi 2; Isa 7:14, Mat 1:23). El Pathian cu Cungnung bik, Zeizongte Hmutu, Lianngan Bik, le kan Sinah A Ummi a si. Amah cu a min ah “Khuarahhar Fim Chimtu, A Ṯhawngmi Pathian, Zungzal Hmunmipa, Daihnak Bawi” a si (Isa 9:6 cun CJB ah Isa 9:5 a si). A cung sangpi, minung he a hlatpi ah a ummi El cu umpitu Pathian zong a si. Hmun le can in cun a hlat le a naih cu an i ralchan. Nain, naih le hlat cu hmun le can kong lawng a si lo; thin le lung kong zong a chim. Cucaah, a hlatmi Pathian cu umpitu Pathian a si ti cu a kalhmi bia a si lo. Cungnung Bik Pathian El Elyon cu kan Sinah A Ummi Pathian Immanu El tiah minung Jesuh in a rung lang.
Hebru Baibal ah El Shaddai cu oi 8 a cuang. Lai Baibal Thiang leh ning in kan tar hna lai.
Genesis 17: 1-2 Abram cu kum 99 a si tikah BAWIPA cu a sinah a lang i, “Kei cu Lianngan Bik Pathian ka si. Na nun chung vialte ka nawl ka ngai law . . . tefa tampi kan pek lai,” a ti.
Genesis 35:11-12 Pathian nih [Jacob] cu, “Keimah cu Lianngan Bik Pathian ka si. Fa tam piin ngei hna . . . a cheu cu siangpahrang an si lai . . . Abraham le Isak ka pekmi hna ram kha nangmah kan pek lai i cu ram cu . . . na tefa hna zong ka pek hna lai.”
Genesis 43:14 Lianngan Bik Pathian nih nannih cu in zaangfah hna seh law mipa nih cun nan nih cun nan unuapa kha le Benjamin cu ka sin ah rak kirter hna seh….
Genesis 48:3-4 Jacoh nih Joseph cu a thawh i “Lianngan Bik Pathian cu Kanaan ram Luz khua ah ka sinah a lang i thluachuah a ka pek. . .” a ti.
Genesis 49:25-26 “Nangmah bawmtu cu na pa i a Pathian, Nangmah thluachuah an petu cu Lianngan Bik Pathian kha a si. Cunglei van ruah thluachuahnak le tanglei ti thuk thluachuahnak le hnuk thluachuahnak le paw thluachuahnak le rawl thluachuahnak le pangpar thluahchuhnak le hlan piin a rak ummi tlang cung thluachuahnak le zungzal hmunmi tlang cung i thil dawh le thil ṭha a ummi vialte . . .”
Exodus 6:3 “Keimah cu BAWIPA ka si. Abraham le Isak le Jakob sinah Lianngan Bik Pathian in ka rak lang. Annih sinnah khan ka min in ka rak i langh lo, ka min cu BAWIPA ka si.”
Ezekiel 10:5 Cherubim hna thla khawn thawng cu lenglei tual tiang khan aa thei kho i Lianngan Bik nih bia chim seh law cu bantuk cun a thang.
Cang khat hnu cang khat in fianternak caan le hmun nih a kan pe lo. A zapi komh in tlawmte fianternak kan tuah lai. Anak in kan ṭialmi cafang pawl zoh in Lianngan Bik Pathian, El Shaddai, cu tefa, bawinak, ram le thluachuah petu muisam a keng. Genesis 49: 25-26 i thluachuahnak phunphun lak ah hnuk, paw (nau inn), le tlang thluachuah pawl khi El Shaddai sullam fianternak ah an biapi. A tawi fawinak in chim ahcun, El Shaddai cu hrinsor le thlairawl thluachuah petu a si. Exodus 6:3-4 lawng in “BAWIPA [Yahweh]” a hun si. Cun, Judah pennak a dongh lei ah “mi fapa” tiah Pathian nih a auhmi Profet Ezekiel nih langhnak in Yahweh sunparnak nih Jersusalem a kaltaknak a hmuhnak ah Pathian cu El Shaddai tiah a ti (Eze 10:5). Pupa Pathian El Shaddai sunparnak nih an te chin an far par ram cu a chuah tak. Sihmanhsehlaw, annih a khamh i a hlawm ṭhan tu cu Immanu El a si.
Hebru Baibal nih El tel loin Pathian cu Shaddai tiah oi 40 hrawng a ti. Job nih oi 30; Number, Ruth le Salm ah oi 2 cio; cun, Isaiah, Ezekiel, le Joel ah oi 1 cio an hman. Job cu hawihnu deuh ah ṭialmi biazai cauk a si. Job biaZAI cu zainak a tam. “Yahweh” ti oi 20 a hman; i oi 10 cu bia tluang biathluan (1:1-27) ah a hman. Shaddai le El a chim ṭi tawn. Tahchunnak ah, Bawipa [Yahweh] nih Job cu a thawh i, ‘Minung nih Lainngan Bik [Shaddai] he bia an i al tikah hin lungṭhawng in um awk a si maw? Pathian [Eloah] he bia aa almi nih hin a leh ṭhan awk a si hnga maw?” a ti. El, Shaddai, le Yahweh cu Laimi nih Khuazing le Pathian kan hman bantuk in pakhat zaka ah adang pakhat an hman ve. Naomi nih “BAWIPA [Yahweh] nih a ka hrem a Lianngan Bik [Shaddai] nih ka cungah harnak a tlunter” a ti (Ruth 1:21). Isaiah le Joel nih Bawipa Ni, Shaddai nih rawhnak a tlunter lai ni cu a phan lio an ti (Isa 13:6, Jeo 1:15).[1] A cung Baibal cang pawl ah Shaddai cu harnak, zatlaknak, le rawhnak chuahpi Pathian a si. An pupa chan ah thluachuah petu Pathian le pu le tu thluachuah an rak i peknak Pathian cu an techin an fapar chan ah harnak le khatnak tuartu tiah an zaihmi Lianngan Bik ah a chuah. A thluahchuah a fim khanh hna caah a si men lai. A thluachuah a dong nain thluachuah petu a hmu lomi Laimi zong Pathian zaihnawh cu kan hmang ve. Bawipa kut ṭhawng kan hmuh lo tikah a lungthin cu kan hmu kho chin chin lo. Ingpuang in kan um.
El Shaddai Biafang Sullam
El Shaddai cu a sullam a fiang lo. Judahmi Mirang Baibal pahnih Tanakh le Complete Jewish Bible nih “El Shaddai” cu an let lo. Lai Baibal Thiang nih “Lianngan Bik Pathian,” Baibal Cathiang nih “Zeizongtuahkho Pathian,” le Falam Baibal Thianghlim nih “Zingkimtithei Pathian” tiah an leh. Mirang nih “God Almigthy” (CSB, ESV, NIV) le “Almigthy God” (KJV,) tiah an leh. El cu Pathian; Shaddai cu “lianngan bik” le “zeizongtuah kho tu” tinak a si.
Grik Biakam Hlun nih a leh ning zoh hna u si. “El Shaddai” cu “na Pathian” (Gen 17:1; 35:11), “ka Pathian” (Gen 28:3; 43:14; 48:3; 49:25), le “an Pathian” (Exo 6:3) tiah ngeih chimhnak biafang bet in a leh. “Pathian” tiah “el” lawng a leh; “Shaddai” cu a let lo. Ezekiel 10:5 ah “Theos Saddai, Pathian Saddai” tiah a hman. El telh loin Shaddai ti lawng in Pathian cu an auhnak baibal cang pawl ah phun nga in a leh: “ho hikanos” (a zami/duh tlingmi pa, the Sufficient One; Ruth 1:20-21; Job 21:15), “ho kyrios” (bawipa; Job 5:17), “ho pantokrator” (nawlngeihnak vialte ngeitu, zeizongte uktu, Job 22:17,25), “theos” (Pathian; Job 40:2; Slm 90:1; Isa 13:6), le “ton epouranion” (vancung i a ummi pa, the heavenly one; Slm 67:15). Shaddai cu “Bawipa” tiah oi tam bik a leh. “Lianngan Bik” hi Grik “ho pantokrator” hin a ra. Latin Baibal nih Shaddai cu “omnipotens,” rikhiahnak um loin nawlngeihnak le tuahkhawhnak in a khatmi, tiah a leh. Kan theih tawnmi tuanbia mitcaw pawl nih an kut tonghnak in vui hmuisam an chim bantukin Baibal lehning nih “Shaddai” muisam cu fiangte in a kan hmuh sak kho lo.
Biafang hram in sullam fianter dan zong a um. Theological Wordbook of the Old Testament timi Biakam Hlun diksennari ah “shaddai” sullam pathum a um. (1) Judahmi sayate nih Shaddai cu “she” (aho) le “day” (a za, a tling) fonh in sermi a si an ti. “Ho hikanos” tiah Ruth le Job ah an leh ning khi a si. (2) Shaddai cu Hebru fainhtu (verb) “shadah, hrawh” he a pehtlai i “a ka hrawktu, my destroyer” tinak a si. “A nuam, a thawmi” ti min sullam ngei mi Noami nih Shaddai nih, “ka cungah khatnak le harnak a tlunter,” a ti. Pathian cu “Shaddai” tiah Job cauk nih oi tam bik a auh. A thin a hung bikmi Baibal chung cauk a si. A mawh bak lo. Pathian kan lei ah a ṭan lo ahcun zeizongte nih a kan doh i thinphawktu le fahtertu zong an tam. Pathian nih a dohmi minung si cu a fak chinchin. Pathian ralchan mi pawl rawhnak cu BAWIPA Ni ah Shaddai sinin a ra lai, tiah Isaiah le Joel nih an ti. El Shaddai cu Hrawktu Pathian lawng a si lo; thluachuah petu Bawipa zong a si. (3) “Shaddai” ti biafang cu Biakam Hlun vawlei ah tlang holh bantuk in an rak hman mi Akkadian biafang “shadu” (tlang) in a ra; El Shaddai cu “Tlang Pathian” tinak a si. Baibal ah Pathian a langhnak le a cawlcanghnak cu tlang cungah a si tawn. Moses auhnak, Nawlbia peknak, Baal a teinak le Jesuh thihnak tepawl cu tlangcung ah an si. Nain, El Shaddai cu khuazei Tlang setset Pathian a si lo. Lai kan pupa nih an rak biakmi tlang hlum thlarau (khuachia) hna cu umnak tlang setset an ngei. Hakha pawl khuahrum (Rung le Met) cu Rung Tlang ah an um. Tiddim pawl Duai-pi cu Kennedy Tlang par ah a um. An umnak hmunhma pinah nawlngeihnak an ngei lo. Israel pupa hna Pathian El Shaddai cu bantuk tlang tlang khat le hmun hmun khat ah a ummi a si lo. El Shaddai cu zeizong vialte tuah kho tu (all powerful), Lai pupa Pathian bantuk a si.
Tuan ah “El Shaddai kong nih an buaiter lai” tiah ralrinnak kan chimmi kha kan tongh cang lai. History of Religions (Biaknak Pawl Chanbia, vol. 21, no. 3; 1982) Journal ah David Biale nih “The God with Breasts: El Shddai in the Bible” tiah El Shaddai cu hnuk ngei Pathian tinak a si, a ti. A cungah “tlang” ti sullam a ngeimi Akkadian baifang “shadu” i a awrizinal sullam cu “hnuk” tinak a si kho; Shaddai ah “dai” khi “a ummi” tinak a si. El Shaddai cu tlang cungmi Pathian (El of the Mountaineers) le hnuk ngeimi Pathian tinnak a si. Baile nih Shaddai cu “hnuk pahnih” tiah leh khawh a si a ti. Hnuk hnih ngei Pathian tinak a si hnga. Kap khat in cun, Pathian kongah mah bantuk bia hawi hna chim cu tiah cak awk a tlak. Adang kap in, Pathian cu nu hmuisam le sining a ngeihnak a langhter. Genesis 1:27 ah “Pathian nih minung cu amah mui lo in a ser . . . mipa le minu kha a ser hna,” a ti. El Shaddai cu pa mui lawng a keng lo; nu mui zong a keng, tinak a si ko. Pathian cu nu bantukin hnukba pahnih a ngei tinak a si lo; nu sining (characteristics) a ngei ve tinak a si. Cucaah, pa muisam lawng keng in Pathian sininng fianter cu a tling kho lo.
El Shaddai Biathluan Theology
El Shaddai a hmangmi Baibal biathluan pawl cu Genesis, Exodus, le Ezekiel chungah kan hmuh hna. “El Shaddai” ti a hmangmi Genesis biathluan pawl cu, Biakam Hlun thiamsang pawl nih, Judahmi Babilon sal taannak in an kir hnu ah an bet hna an ti. Hawi hnu ah ṭialmi an si; nain, an pupa hna nih El Shaddai an rak zumh ning a si lo tiah kan chim kho lo. An Pathian cu Yahweh tiah an rak theih hlan ah El Shaddai tiah an hngalh hmasa. Genesis nih El Shaddai cu nau-inn hrinsor le lo chuah theipar tampi petu Pathian hmuh in an rak hmuh. Cucu a cungah kan nah termi cafang pawl nih an langhter. El Shaddai cu thluachuah petu le tluachuah i peknak Pathian a si. Hnuk ngei Pathian tiah nu muisam a ngeihnak cu Genesis 49:25 a si. Tluahchuah phunphun lak ah “hnuk, breasts” le “nau-inn, womb” thluachuah an i tel. El Shaddai thluachuah cu nu sin in a si loah nu telpinak in hmuhmi thluachuah an si, a bik in tefa le miphun ngan sinak thlauachuah. Ram le Bawi sinak thluahchauh zong rammi le penmi, nu chung chuak minung an um hmasa a herh.
Exodus ah El Shaddai cu Yahweh tiah hun hngalh a si. Phun dang in chim ahcun El biaknak cu Yahweh biaknak ah a hun i tleng. El cu pathian tampi biaknak ah pathian pakhat ah ruah khawh a si. Yahweh biaknak cu Pathian pakhat biaknak (monotheism) a si. Cun, Shaddai tiah nu sining a ngeihnak zong Yahweh tiah pa sining khel a thlirmi Pathian muisam nih dawlh hram a thawk. Cu ticun, Pathian cu pa muisam a hung keng chin leng mang.
“El Shaddai” tiah Ezekiel lawng ah a hung cuang ṭhan. Profet Ezekiel cu Judahmi sal ah an taan chan ah a cawlcang. “El Shaddai” tiah Pathian a auhnak biathluan cu Lai Baibal Thiang nih “Pathian Sunparnak Nih Jerusalem A Kaltak” (Dal 10) tiah biatlang a pek. Judahmi cu thlarau lei in siasal biaknak lei ah an aa mer, i vawlei lei in Yahweh nakin ram ṭhawngṭha an i bochan deuh. Kanaanmi biakmi pa pathian Baal le nu pathian Ashtoreth nih an lung a lak hna (Biac 2:13; 1 Sia 11:33). Baal le Ashtoreth hmuisam pahnih fonh cu El Shaddai muisam he a lo ngai. Baal cu “bawipa, ka bawipa” tinak a si. El Shaddai bantuk in lo thlo pawl caah van le vawlei thluachuah pe tu pathian a si. Ashtoreth cu ralkap le nau-sernak lei nu pathian a si. Solomon chan in siasal biaknak ah pial hram an ithawk cang. Yahweh kaltak in pathian deu hnu an zulh caah Yahweh nih Jerusalem a chuaktak thawng cu El Shaddai biachim thawng he a tah chunh. Pale nih nupi le fale kal tak le nupi nih a va kaltak cu a um tawn. Nule nih an fale hlawt le kaltu cu bia ngai a si. Cucaah, Ezekiel hmuh mi langhnak nih Israel le Pathian an iṭhen dan a thuh ning le a fahning a langhter. Bawipa nih El kal in a kaltak hna. Isaiah nih “Immanu El” timi fapa pek in a hlawm hna lai tiah a chim chung.
Pathian cu Shaddai tiah an auhnak biathluan hna nih a tlingmi, a ṭhawngmi, le zeizongte tuah kho tu Pathian a sinak an thlir. A tangah kan zoh hnga mi biathluan pathum ah Shaddai cu ralkap (tu ye kawng) muisam a keng.
David hla “Ral Tei Thangṭhatnak Hla” (Salm 68) in thawk u si. Hi salm nih Pathian cu “elohim” (oi 27), “Adonai” (oi 6), “Yahweh” (oi 4), “el” (oi 4) le “Shaddai” (1) tiah a auh. “Lainngan Bik Pathian nih siangpahrang hna cu . . a ṭhek dih hna” (Slm 68:15). Pathian cu ral tei dih tu Ralbawi a si. Hnuk ngei nu hmuisam in teitu ralbawi muisam a hun keng. The Expositor’s Bible Commentary with the New Interantional Version timi carun ah Salm a hrilhfiahtu Willem A. Van Generen nih Salm 68 cu “God Is a Father to the Oppressed” tiah biatlang a pek; Pathian cu hremmi hna chanhtu le khamhtu Pa muisam a ken ter. Pathian nih nu sining a ngeihnak si loin teitu ralbawi, pa sining, tu an thlir.
Cun hi Salm an lehnak ah nu muisam an thlen. Hi Salm chungah nu cu ralkap an si; ralbawi cu Bawipa a si: “Bawipa [adonai] nih nawlbia cu a chuah i cu thawng cu nu tampi nih an kalpi” (Slm 68:11). Hi “tampi” cu Hebru Baibal nih “ralkapbu nganpi” (“a mighty army;” Complete Jewish Bible) tiah leh khawh mi “saba rab” a hman. Grik nih “dynamis polys” (a great power, a ṭhawng ngan mi) a ti. Nain, Lai le Mirang Baibal nih thawngṭha phortu nu cu an tampi tiah an leh; nu pawl cu a ṭhawngmi ralkap (worriors) muisam an ken ter hna lo. Profet Jeremiah nih cun a sungmi ralkap (warriors) cu nu he a tah chunh hna (Jer 51:30). El Shaddai sining le minung nu an namnehnak a ruang pakhat cu Yahweh cu Israel uarmi Ashtoreth timi nu pathian—ralkap le nuasernak pathian—muisam a keng sual lai ti an phan caah a si kho. Cuticu, Baibal caṭialtu, lettu le hrilhfiahtu nih Pathian ngeihmi nu sining cu pa pawl kuang chungah an fim i a tawne ah an chiah. Nu pathian Ashtoreth ciamhter an timhnak ah Shaddai nu muisam zong an ciamh ter chih.
Shaddai Pathian ṭhawnnak a hmu mi nih hrawhnak tluntertu Pathian muisam an ngeihter. Isaiah le Joel nih BAWIPA Ni— Shaddai nih rawhnak a tlunter ni—cu a ra lio cang tiah an chim (Isa 13:6. Jeo 1:15). Hi Ni cu vawlei chanbia a dongnak ni a si. Biakam Hlun bia a si nain Biathlam chung Johan hmuhnak phun—donghnak caan khong an chim. Sal tangmi an kir hnu zongah palh le pial a hmangmi minung cu BAWIPA pialtak in pathian deu le serchawm pathian phunphun hnu kan zul ko lai. Israel profet hna nih an khamhnak le an donghnak an chimmi cu kan nih miphun dang ca khamhnak le donghnak zong a si ve. Hi donghnak le khamhnak kongkau laireltu ah Fapa Immanu El pek kan si. Kan sinah a ummi El cu chanhtu le khamhtu muisam a keng lai maw?
Kan Sinah A Ummi El
Ni hmanung bik ah an pupa El nih a rung kir hnawh hna. Sal tan chan ah Jerusalem a chuahtak mi Yahweh sunparnak cu Immanuel in a rung kir ṭhan. Matthai Thawngṭha a relmi Khrihfa mit in Isaiah bia kan rel caah hi biatak cu kan chim khawh. Matthai nih Isaiah bia cu rak char hlah sehlaw, ngaknu pakhat hrinmi fapa Immanuel cu Messiah Jesuh kong chim chungnak a si, ti cu a ruah awk kan hngal hnga lo.
“Immanuel” cu Judahmi nih an biapit ter maw? Isaiah nih hmelchuhnak fapa min pali a chim. Shear Jashbub (“mi tlawmte lawng an kir ṭhan lai,” Isa 7:3), “Immanuel” (Isa 7:14), “Maher-shalal-hash-baz” (“Thil chuhnak le ramhnak rianrang in a ra lai;” Isa 8:4), le “Pele-Yo’etz El Gibbor Avi-‘Ad Sar-Shalom” (“Khuarauhhar Fim Chimtu, A Ṯhawngmi Pathian Zungzal Hmunmi Pa, Daihnak Bawi,” Isa 9:6). Pahnih cu amah Isaiah fale an si. Pakhat cu a dingmi Messiah Siangparang a si. Immanuel cu anmah Judahmi mit ah Isaiah chan ah siangparang ṭha Hezekiah khi an chim duh tiah Judah rabbi nih an ti. Kan chim duhmi cu fapa min “Immanuel” cu Fapa min “Khuaruahhar . . . Daihnak Bawi” tluk in sullam ngei le thuk ah an rak ruat lo. Matthai nih Cathiang chimchungmi cu Jesuh ah an tlinnak hmuhsaknak ah a hman caah “Immanuel” cu Khrihfa caah sullam a ngei khun.
“Ngaknu” cu “virgin, ngaknu thiang” tinak theng a si maw? Kan chan nungak kongah hi bia hal kan hauh cu ngaihchia a si. An chan zaran nungak cu pa an thei rih lo, an thiang. Nungak cu “A virgin maw?” tiah an lung hrinh lem hna lai lo. Isaiah hmanmi “almah” cu Hebru Baibal ah oi 6 kan hmuh chap: “ngaknu pakhatkhat” (Rebekah; Gen 24:43), “ngakchianute” (Meriam; Exo 2:8), “nu pawl” (Slm 68:26), “pa nih ngaknu he an kalnak lam” (Phut 30:19; ka hin cu “virgin” a si ti awk a ṭha lo), le tlangval duhmi “leeng” (Sol 1:3; 6:8). Almah cu va ngeih a za mi nu le nutung no (fa a ngei rih lomi) a si, tiah Holiday ṭialmi Hebrew and Aramiac Lexican of the Old Testament, timi Hebru le Aramiac diksenari ah kan hmuh. Almah sullam pahnihnak bantukin Jesuh nu Mary cu “fa ngei rih lomi nutung no” men a si lo, pa a thei rihlomi virgin bak a si ti langhternak ah Josef he “fa a hrin hlantiang, nu le va an si lo” tiah Matthai nih fiangte in a ṭial.
“Immanuel” maw, “Emmanuel” dah? Lai Baibal Thiang ṭial ning in chim ahcun Biakam Hlun ah “Immanuel” le Biakam Thar ah “Emmanuel” ti a si. An i thawknak “I” le “E” nih an sullam a danter lo. Hi Messiah min cu leh lomi min a si. Hebru cafang fonh a zulmi nih “I” (CJB, ESV, NAS, NIV, NKJ) le Grik a zulmi nih “E” (KJV, NET, NRS) tiah an ṭial. Hebru bia ning in cun “Kan sinah Pathian” ti a si. Grik le Mirang Baibal nih “God with us” tiah fianhtu “um” tel loin an leh. Phundang deuh in Young’s Literal Translation nih “With us he is God” (Kan sinah amah cu Pathian a si) tiah a leh. Lai Baibal nih “Pathian kan sinah a um” (LBT, HBT), “Kan sinah Pathian a um” (BC), le “Pathian he kan um” (BhT) tiah an leh. Biahren Thar nih phun dang tein a leh. Matthai 1:23 i Grik bia ah fiantu (verb) “um” a um lo. Salm 23:4 i “Nang ka sinah” ti bantuk a si. Holh leh mi Baibal nih fianhtu “um” cu an bet cio. An awrizinal bia cu “Kan sinah Pathian, God with us” le “Nang ka sinah, You with me” tiah fiantu “um” telh lo, grammar tling lo in Pathian umpinak cu ngakchia biachim an chim. A grammar a tling lo nain bochannak le Pathian umpinak cu a tling.
Sed et aliquam tincidunt ut sed porttitor nunc et etiam molestie arcu donec venenatis nulla nunc massa tellus mauris vitae lorem sit semper natoque fusce lectus urna.
Pellentesque viverra
Biatlang Kawmnak
El Shaddai cu Israelmi pupu hna Pathian a si. Yahweh Elohim (BAWIPA Pathian) tiah hngalh le biak a si hlan in El Shaddai cu Israel hringsortu Abraham, Isak, le Jacob te Pathian a rak si. Shaddai cu zeizong tuah khotu, zalak in a ngei mi, lianngan bik, hnuk ngei mi le hrawktu tiah sullam phunphun in an pek. Buailen awk um loin a fiangmi pakhat a um. El Shaddai biathluan ah Pathian biakamnak le thluachuahnak kan hmuh.
Cu biakamnak le thluachauhnak lam cu Pathian nih Abram sinah a chimh, “Kei cu Lianngan Bik Pathian ka si. Na nun chung vialte ka nawl ka ngai law, soi awk zeihmanh umlo in um” (Gen 17:1), tiah a ti. Israel nih Pathian kaltak in siasal biaknak ah an pial tikah BAWIPA ni El Shaddai kal in a kaltak hna. Sihmanhsehlaw, zungzal ca in a kaltak hna lo. El min chalh in an khamhtu le hlawmtu ah a run hnawh ṭhan hna. Israel pupa Pathian El Shaddai, Yahweh Elohim tiah an rak biakmi cu kannih Lai Khrihfa zong nih kan Pathian biak in kan biak ve. Israel pupa Pathian, El Shaddai, cu kan sinah a ummi El (Emmanuel) a si. A kan umpi taktak. Biahren Thar nih Emmanuel cu “Pathian he kan um” tiah a leh. Kannih smart phone chan mi cu pum, hmun, le caan in a um ṭimi poah thinlung le thlarau in an um ṭi ti lo. Kan mah le kan phone cio he kan um cio hna. Thinlung le thlarau in Pathian he kan um ṭi maw? “Pathian nih a kan umpi” ti cu biatak a si; A tak in Pathian he kan um ṭi, ti cu kan i hal len awk bia a si.
[1] Lai Baibal Thiang nih“BAWIPA [Yahweh] nih cu a nai cang; Cu ni cu BAWIPA [Shaddai] sinin a chuakmi rawhnak ni a si lai,” tiah Yahweh le Shaddai cu “BAWIPA” tiah a leh hna.
